በደሴ “አረብገንዳ” መስጊድ ፖሊስ ጥቃት ሰነዘረ

(አቤ ቶኪቻው) 

ላለፉት ስምንት ወራት የቀጠለው ኢትዮጵያውያን ሙስሊሞች የሚያሰሙት ተቃውሞ በዛሬው ዕለትም በተለይም በአዲስ አበባ አንዋር መስጊድ እና በደሴ አረብገንዳ መስጊድ ቀጥሎ የዋለ ሲሆን ፖሊስ በደሴ የተገኙት ሙስሊም ኢትዮጵያውያን ላይ ጥቃት መሰንዘሩን ወሬዎች ደርሰውኛል።

የረመዳን ፆም እንደገባ “ድምፃችን ይሰማ” በሚል ተቃውሞውን ሲያስተባብሩ የነበሩት የኮሚቴ አባላት በፖሊስ ቁጥጥር ስር ቢውሉም ህብረተሰቡ በራሱ አስተባባሪነት “ኮሚቴዎቻችን ይፈቱ” የሚል ተጨማሪ ጥያቄ አንግቦ ተቃውሞውን ቀጥሏል።

ባለፈው ሳምንት ተቃውሞቸውን በይፋ የጀመሩት የደሴ ከተማ ህዝበ ሙስሊም ወገኖችም ተቃውሟቸውን በተጠናከረ መልኩ ዛሬም የቀጠሉበት ቢሆንም ልዩ የፖሊስ ሀይል “ከመስጊድ እንዳይወጡ ከልክሎ” የተለያዩ እርምጃዎችን መውሰዱን ሰምቻለሁ። በተተኮሱ አስለቃሽ ጭሶች ሴቶች እና በዕድሜያቸው የገፉ ሰዎች ራሳቸውን ስተው በመስጊድ ውስጥ እርዳታ ሲደረግላቸው እንደነበር ከስፍራው የሰማሁት ወሬ ያስረዳል። (ያረዳል ብንለው ይሻላል)

ባለፈው ጊዜ፤ “ህብረተሰቡ ተረባርቦ ይሄንን ተቃውሞ የማያስቆም ከሆነ የከፋ ነገር ይመጣል!” ሲሉ የፖሊስ ኮሚሽነሩ አቶ ወርቅነህ ገበየሁ በሞቅታ ይሁን በብስጭት ሲናገሩ ሰምቻቸዋለሁ።

እኔ የምለው ግን የራሳችን ሀገር ፖሊስ “ወዮላችሁ!” እያለ የሚያስፈራራን ከሆነ ጠባቂያችን ማነው!? ብሎ መጠየቅ ይቻላል!?